Collecha escoyida nunes Lletres pa tolos públicos

Un mayu más, los escaparates de les llibreríes asturianes escamplaron la tinta fresco de les novedaes editoriales aparecíes na fiesta de Les Lletres. Títulos de tolos xéneros y pa tolos gustos llectores participen d'esta segunda collecha de primavera que paña'l relevu a la estrenada San Xurde. Les ventes ficiéronse notar afalaes pol descuentu avezáu del 10 por cientu y tamién pola fame de mercar en data tan señalada, según confirmen tres llibreros consultaos a costafecha. Caún d'ellos revelónos al empar cuálos fueron los tres llibros más demandaos nos sos respectivos negocios.

D'esti sondéu, ensin más enfotu que'l d'ufrir una pequeña amuesa de lo vendío el Día del Llibru Asturianu, lo más llamativo ye que toles tres llibreríes coinciden nel títulu cabezaleru y tamién nel fechu de que seya de poesía. Trátase de 'Lo verdadero' (Trabe), la recién entrega de la poeta Lourdes Álvarez. Ye l'únicu casu que se repite ente los títulos citaos polos llibreros.

Asina, per detrás del poemariu de la escritora d'Urbiés, Miguel Gallardo, de La Llocura de Mieres, resalta la edición en llingua asturiana de 'Fabada. Historia y simbolismu d'un iconu asturianu' (La Fabriquina), d'Alicia Álvarez y David Guardado, coles collaboraciones d'Arantza Margolles, Xuan F. Bas, José Luis Carmona, Lluis Nel Estrada, David Castañón y Damián Barreiro. L'otru titulu: 'La fin y outras cousas que van sele' (Cuatro Gotes), del escritor llionés Fran Allegre.

Esther Prieto, de la Llibrería Trabe d'Uviéu, xunta 'Lo verdadero', enumera 'Pel norte N'El Cantu Llunada', Premiu 'Muyer' de Narraciones de la debutante Marina Pangua, y en tercer puestu 'Cai la tierra', de Carmen Pellegrino, traducíu por Paco Álvarez, toos publicaos en Trabe. Amesta arriendes el volume infantil y autoeditáu 'Asturies de la A a la Z', d'Eva Rami.

Pel so llau, Rafa Gutiérrez Testón, de La Buena Letra de Xixón, axunta al llibru de Lourdes Álvarez 'L'asturiana' (Delallama) –la novela de Caroline Lamarche na versión na nuestra llingua de Xandru Martino– y el poemariu 'Rumbu' (Trabe), col qu'Alfredo Garay algamó'l Premiu Teodoro Cuesta. Y en lliteratura infantil 'Contando colos deos'(Impronta), de la ya citada Eva Rami y Xosé Anxelu Gutiérrez Morán.

A la vera de los títulos que resalten los llibreros, nestes Lletres acabantes de cellebrase dedicaes a l'alcordanza de Xosé Álvarez, Pin, amás de la obra conmemorativa sobre la so figura que s'ufría como llibru-regalu y de l'antoloxía lliteraria de la emigración asturiana 'Per toa tierra', entamada por Arantza Margolles, llegaron a los escaparates noveles como 'Dípteros', de Sidoro Villa Costales, y 'Tiempu de tristura', de Nel Morán, entrambes publicaes por Impronta. Tamién la segunda andanada clariniana d'Adrián Carbayales: 'La Rexenta contra Frankenstein', nel sellu Radagast, que tamién asoleya 'Nosotres. Antoloxía fantástica', con relatos de doce autores muyeres o 'Equipu Texu. L'estandoriu máxicu' de Sergio Buelga.

Una collecha más escoyida qu'abondosa na que nun faltaron el volume regalu de la Conseyería de Cultura pa las Nosas Lletras, el poemariu 'El delicado equilibrio del funámbulo' de Conchita Álvarez Lebredo y el númberu 41 de la revista Lliteratura de l'Academia de la Llingua Asturiana, con formatu y diseñu nuevu, arriqueciendo un poco más la Biblioteca de Babel.

• Temas
• Alitar Asturies